«Қазгидромет» РМК қауіпті агрометеорологиялық құбылыстар туралы дауылды ескерту жариялады, деп хабарлайды Malim.kz.
Сонымен бірге еліміздің бес облысында, атап айтқанда, Жамбыл, Түркістан, Қызылорда, Алматы мен Ұлытау облыстарында құрғақшылық болуы мүмкін екенін хабарлады.
Алдағы 10 күнде Жамбыл облысында Байзақ, Талас, Сарысу, Жуалы, Жамбыл мен Рысқұлов аудандарында, Түркістан облысында Түркістан, Сайрам, Шардара мен Жетісай аудандарында, Қызылорда облысында Арал ауданында, Алматы облысында Балқаш, Жамбыл аудандарында және Ұлытау облысында атмосфералық құрғақшылық болуы ықтимал, - делінген «Қазгидромет» РМК дауылды ескерту туралы хабарламасында.
Бүгін Алматы қалаcында ауаның ластануының қолайсыз метеорологиялық жағдайы болуы мүмкін.
«Қазгидромет» РМК-нің хабарлауынша, алдағы күндері еліміздің батысында бірнеше күн бойы тұрған аптап ыстықтың беті қайтады.
22 маусымда жауын-шашынның әсерінен ауа температурасы өзінің климаттық қалпына оралады.
Еліміздің солтүстігі мен орталығында жауын-шашын аздап тоқтағаннан кейін, жаңбыр жауады. Сол кезде найзағай ойнап, кейбір өңірлерде қатты жаңбыр, бұршақ пен қатты дауыл соғады. Ал еліміздің оңтүстігіндегі таулы жерлерде күндізгі конвекция әсерінен әлі де тұрақсыз ауа-райы болады. Тек шығыс аймақтарда айтарлықтай жауын-шашын болмайды.
Фото: pixabay.com
