БҚО-да Ресеймен шекарада жүк көліктері кептеліп қалған
Қазақстанға кірер бағытта бір жол ғана істеп тұр
Батыс Қазақстан облысындағы Қазақстан-Ресей шекарасында ұзын-сонар кезекке байланысты жүк көліктерінің жүргізушілері шағымданды. «Мой город» жазуынша, «Маштаково» және «Сырым» өткізу бекеттерінде жүк тасымалдаушылардың күту уақыты бірнеше сағатқа созылады, деп хабарлайды Malim.kz.
Жүк көлігі жүргізушілерінің бірі 16 сағат бойы «Маштаково» бекетінде тұрып қалғанын айтқан. Оның сөзінше, кезектердің басты себебі – нейтралды аймақтың толып кетуі. Оның себебі, Қазақстан тарапы бір бағытта алты жолақты ашып, керісінше бағытта тек бір жолақты жұмыс істетіп отырғанына байланысты.
Жүргізушілер жағдайды «бақылаудың жоқтығы» және «беталды» деп сипаттап, мәселенің қашан шешілетінін сұрап отыр.
Қазақстан ҰҚК Шекара қызметінің БҚО бойынша өкілдері мәселені Ресейдің «Маштаково» өткізу пунктіндегі жол жөндеу жұмыстарына байланысты деп түсіндірген.
Ресейдің Орынбор облысындағы шекара бекетінің хабарлауынша, «Маштаково» бекетінде жолдарды жөндеу жұмыстары жүргізіліп жатыр. Бұл жөндеу 31 қарашаға дейін жалғасады деп жоспарланған. Осыған байланысты бекеттің өткізу қабілеті төмендеген.
Шекара қызметі көлік жүргізушілеріне «Ақсай», «Шаған» және «Тасқала» өткізу бекеттері арқылы қозғалуға кеңес береді. Бұл бекеттерде қазір жүктеме аз.
Фото: qazavtojol
