«Бұл тозақты көрмесем...»: Дана Нұржігіт экс-күйеуінен көрген қорлығын айтты

Танымал тележүргізуші Дана Нұржігіт Динара Сәтжанға берген сұхбатында экс-күйеуінің бопсалағанын және 3 жылға шартты түрде сотталғанын айтты. Енді ол әрі қарай да күресті тоқтатпайтынын мәлім етті, деп хабарлайды Malim.kz.

«Мына суретте мені түнектен алып шыққан адамдар тұр.Жапанда жалғыз қалған ана мен балаға қорған болған қос адвокатым-Тілек Хамитов және Арайлым Карпеева. Бүгінде екеуі де менің адал достарым. Бұл адамдар менің қандай жағдайда қалғанымды көріп, істі соңына дейін жеткізді. “Дана ханым, сабыр етіңіз! Алып шығамыз!” деп, қалтамда бақыр тиыным қалмағанын көріп тұрып,орта жолда қалдырмады. Телевизияға жарамай қалғаннан кейін,”Дана сөзді” аштым. Алдыма келген тыңдаушылардың ішінде Эльвира Шырынбаева болды. Жеке меншік мектептің иесі. Менің басымнан өтіп жатқан оқиғадан мүлдем хабарсыз ол мені мектебіне ұстаз болуға шақырды. Сол жұмыстың арқасында мұғалімдік жолға түстім. Нан таптым. “Осылай амалдайын” деп бастаған мен қазір Ұстаз болғаныма қуанамын. Балаларымнан қуат аламын», - деп жазды Дана Нұржігіт.

Тележүргізіші мұндай оқиғалардың қоғамда жиі кездесетінін атап өтті.

«Ата-анамен бірге кітап оқуға баулитын reading time сабағын жүргізіп,өзімді емдеп алдым. Бұл тозақты көрмесем, мен мүмкін мұғалімдікті мүлдем ойға да алмас па едім, кім біледі?! Әр істің қайыры бар деген… Басымнан өткен оқиғаны баяндап, біріңізге “шошқа”, біріңізге “өжет, қайсар әйел” болып жатқанымды оқып отырмын. Кейбіреулер мәселенің түбіне үңілмей “екі жақтан” деп қысқа қайырыпты. Тарқатып, ақталып әлек болмаймын. Мұндай жағайды ешкім басына тілеп алмайды! Бұл оқиғаны мен қазір қоғамның дерті,әлеуметтік құбылыс деп қараймын», - деп жазды ол.

Дана Нұржігіт заңға арнайы бап енгізуді талап етіп отыр.

«Мен сталкингке, кибер-сталкинге қарсы күресті тоқтатпаймын. Қылмыстық кодексте арнайы бап болуын талап етемін! Кеше ғана ІІМ Сенатқа депутат болып барған Марат Шәдетханұлы Қожаев мырзаның назарына, мәжіліс депутаттарының назарына! Бұл адам құқығы мәселесі. Қауіпсіздік мәселесі. Жеке мәліметтердің таралмауы, ал қолды болған жағдайда қылмыскердің шоқпарына айналмауы заңмен реттелеуі керек!», - деп жазды ол.