Дәулет Тұрлыханов ұлының денсаулығына алаңдайтынын айтты

Жуықта Мәжіліс депутаты Дәулет Тұрлыхановтың пробациялық бақылауда тұрған ұлы тағы да жүртты дүрліктірген болатын. Нұрасыл Болаттың мейрамханада тойлатып жүрген видеосы желіде таралды. 

Осыған қатысты тілшілер депутатқа сұрақ қойды. Дәулет Тұрлыхановтың айтуынша, ұлының Алматыға тойға барғанын білмеген.

- Бұл іске араласқым келмейді. Жас қой әлі. Онымен үнемі сөйлесетінмін. Қай әке баласының жаман болғанын қалайды? Әрине, бұл туралы ойлаймын. Біз оған қолымыздан келгеннің бәрін жасадық, бірақ неге және қалай болғанын білмеймін. Жасы небәрі 21 жаста болса да соңынан аңдып жүр. Егер оның психикасына зардап тисе, кім жауапты? Сондықтан айтарым: менің балам өте жақсы, тәрбиелі. Енді достарымен араласа алмай ма? Туған күн кешіне баруға болмай ма? Бұл туралы қатты алаңдаймын. Баламның денсаулығы да алаңдатады, - деді Тұрлыханов Мәжіліс кулуарында.

Сондай-ақ депутат заңнамаға сәйкес ұлы бас бостандығынан айырылуы мүмкін деген сауалға да пікір білдірді.

- Неге оны бас бостандығынан айыруымыз керек? Не үшін? Сағат 20:30-да ол әріптестерімен отырды. Ішпейді. Оны бірден түрмеге жапсақ, тәрбие емес қой, - деді Тұрлыханов.

Айта кетсек, Нұрасыл Болат 2023 жылдың 11 ақпанында Алматыда ерлі-зайыпты Анна мен Олег Черновтарды ұрып-соққан болатын. Пробация бақылауын ол осымен екінші рет бұзып отыр. 

Фото: kaztag.kz (коллаж)