Дәулет Тұрлыхановтың ұлы 2 жылға бас бостандығынан шектелді
Жоғарғы сот істі қайта қарады.
![](/images/article-img/1600/21902-1715676934-m.jpeg)
Жоғарғы сотта екі заңгерді соққыға жыққан Дәулет Тұрлыхановтың ұлы Нұрасыл Болатқа қатысты қылмыстық іс қаралды, деп хабарлайды Malim.kz.
2023 жылдың қазан айында Алматы гарнизоны Әскери сотының үкімімен Нұрасыл Болат бұзақылық себептермен, ерлі-зайыпты О.Чернов пен А.Чернованың денсаулығына қасақана ауырлығы орташа зиян келтіргені үшін Қылмыстық кодекстің 107-бабы 2-бөлігі 1), 5) тармақтары бойынша сотталған болатын.
Сот үкімімен 500 АЕК (1 725 000 теңге) көлемінде айыппұл түрінде жаза тағайындалған. Сондай-ақ жәбірленушілердің пайдасына әрқайсысы 500 мың теңге моральдық шығын және өкілдің қызметіне өтемақы төлеуге кеткен 1 600 000 теңге өндірілді.
Апелляциядан соң сот үкімі өзгертіліп, Нұрасыл Болаттан жәбірленушілердің пайдасына апелляциялық сатыдағы сотқа қатысу үшін өкілдің қызметіне 400 000 теңге көлемінде шығын өндірілді.
Кассациялық сот отырысы жәбірленушілердің өтінішхаты бойынша өтті. Олар сот актілерін өзгертіп, айыпталушыға бас бостандығынан айыру жазасын тағайындауды сұрады.
Жоғарғы Соттың қылмыстық істер жөніндегі сот алқасы сот актілерін өзгертіп, Нұрасыл Болатқа 2 жылға бас бостандығын шектеу жазасын тағайындады. Сондай-ақ жәбірленушінің әрқайсысына берілетін моральдық залалдың өтемақы мөлшері 1 миллион теңгеге дейін өсті.
Фото: интернеттен