Қырғыз жанкүйерлері көкпар нәтижесіне наразылық білдіріп жатыр

Астанада өтіп жатқан Дүниежүзілік көшпенділер ойынында көкпардан финалдық ойын 5:4 есебімен қазақтардың жеңісімен аяқталды. Бәсеке кезінде көкпаршылар арасында дау туындап, бір-біріне қамшы сілтеген болатын.

Араға тәртіп сақшылары түскеннен кейін ойын біраз уақытқа тоқтатылып, қайта жалғасты. Бұл уақытта Қырғызстан 3:1 есебімен алда тұрған. Осыдан кейін Қазақстан командасы серкені қазандыққа қайта-қайта салып, ақыры ойынды жеңіп шықты (5:4).

Мұнан соң қырғыз жанкүйерлері әлеуметтік желі арқылы жарыс төрешілері мен Қазақстан құрамасына наразылық білдірді. Олар Instagram желісіндегі қырғызстандық пабликтерде төреліктің әділ болмағанын айтуда.

«Жеңіс емес, масқара болдыңдар. Жеңісті спортшылар емес, төрешілер алып берді», «Қазақтарда намыс жоқ екен, масқара», «Төреші мүлде қарамады, масқара. Бұл жеңіс емес», «Бұдан былай көкпар ойнамаңдар, масқара», «Қырғыздарға мұндай жеңіс керек емес. Қазақтар егер, еркекпіз, қазақпыз десе бұлай жасамайтын еді», «Төрешіге шапан жауып, көлік мінгізіп қойған ғой», «Тіпті ұялғаннан видеоны өшіріп тастапты», «Біздің де күніміз туар», - деп жазып жатқанын байқауға болады. 

Фото: worldnomadgames.kz