Су тасқыны: Президент шұғыл кеңес өткізді
Кеңеске премьер-министр Олжас Бектенов, үкімет мүшелері, президент әкімшілігінің басшылары қатысты. Үкімет басшысы президентке елдегі төтенше жағдайға орай ахуалды баяндаған.
Оның ішінде, су басқан ауыл тұрғындарын құтқару мен тасқын салдарын жою мақсатында істеліп жатқан жұмыстар жайын баяндады. Бұл туралы Ақорданың телеграм каналы хабарлады.
Президент үкімет пен әкмідердің жұмысын сынаған. Ол үкімет пен жергілікті атқарушы билік бірігіп іс атқара алмаған деген тұрғыда ойын айтты.
Президент жағдайға қатысты дер кезінде шара қабылдамағаны үшін премьер-министрдің бірінші орынбасары Роман Склярға, Су ресурстары және ирригация министрі Нұржан Нұржігітовке қатаң сөгіс жариялады. Атырау, Ақмола, Алматы, Павлодар және Абай облыстарының әкімдері де қатаң сөгіс алды. Ал Ақтөбе, Қостанай, Батыс Қазақстан облыстарының әкімдеріне қатаң сөгіс және қызметтік міндеттеріне толық сай келмеуіне байланысты ескерту жасалды.
Кеңесте Республикалық штаб құру, су тасқынына қарсы жұмысты күшейтіп, азаматтардың қауіпсіздігін қамтамасыз ету жөнінде тапсырма берілді.
Табиғи апат келтірген шығын көлемін анықтап, келешекте мұндай апаттардың алдын алу үшін кешенді шаралар қабылдау міндеті жүктелді.
Фото: Ақорда
