Шымкенттегі өрттен 10 адам зардап шеккен

Төтенше жағдай 27 шілде, сағат 11.35-те басталған. Өрт индустриялық аумақтағы техникалық газ күкіртінің тұтануынан шыққан. Қызыл жалын 1200 шаршы метр аумақты шарпыған. 
«Шақырту бойынша оқиға орнына келген өрт сөндірушілер ашық күкірттің жанып жатқанын анықтады. ТЖМ күштерімен өрт сөндіру жұмыстары жүргізілді. Оқиға орнына ҚТЖ өрт сөндіру пойызы, жергілікті атқарушы орган, санитарлық-эпидемиологиялық бақылау департаменті және эколог мамандар жұмылдырылды. ТЖМ құтқарушылары жергілікті атқарушы органмен бірлесіп, инертті материалдарды төсеу және газсындандыру жұмыстарын жүргізді. Күкірттің тотығуы қызыл жалынды сөндіру жұмыстары кезінде қиындықтар туындатты», - деді Шымкент қалалық ТЖД дағдарыс жағдайлары басқармасының жедел кезекшісі, азаматтық қорғау капитаны Ердос Ахметов.
Апатты аумаққа жақын Шаңырақ шағынауданыныннан 443 адам эвакуацияланды, оның ішінде 233 бала. 
ТЖД мәліметінше, оқиға орнынан күйік шалған және улану белгілері бар 10 адам (1 күйік, 9 улану) медициналық көмекке жүгінген. Дәрігерлер тексеруінен кейін 2 адам ауруханаға жатқызылды. Қалған 8 адамның денсаулығы қалыпты. Олар үйлеріне қайтарылған. 
Өрт 28 шілде 00:36-да оқшауланып, таңғы 05:00-де толықтай сөндірілді. Қазіргі таңда өрттің шығу себебі анықталып жатыр. Өртті сөндіруге 700-ден астам адам, 129 техника және 1 өрт сөндіру пойызы жұмылдырылған.

Фото: ТЖМ