Халықтың төрттен бірі ғана елдегі үй сатып алу мүмкіндігіне қанағаттанады – сауалнама

Ұлттық статистика бюросы былтыр ел азаматтары арасында үй алу мүмкіндігі мен осы бағытта мемлекет тарапынан көрсетілетін қолдау туралы сауалнама жүргізген. Energyprom жазуынша, онда сауалнамаға қатысқандардың төрттен бірі ғана тұрғын үй сатып алу мүмкіндігіне қанағаттанатынын білдірген, деп хабарлайды Malim.kz.

Сауалнама түрлі тақырыптарды қамтыған, соның бірі тұрғын үйдің қолжетімділігі мәселесіне қатысты болды.

Жалпы алғанда, қазақстандықтардың тұрғын үйді сатып алу мүмкіндігі мен мемлекет тарапынан көрсетілетін қолдау туралы пікірлері жақсарғаны байқалады.

Мысалы, сауалнамаға қатысқандардың 25%-ы тұрғын үй сатып алу мүмкіндігіне қанағаттанушылық білдірді. Бұл көрсеткіш өткен жылы 20,5% болған. Тек жартылай қанағаттанғандардың үлесі 39,6%-ды құрады, бұл көрсеткіш өткен жылы 40,1%-ды көрсеткен. Ал үй сатып алу мүмкіндігіне толықтай қанағаттанбағандар 20,5%-ды құрады, бұл алдыңғы жылға қарағанда 0,9 пайыздық пунктке азайған. 14,9% респондент жауап беруге қиналды, деп жазылған сайт хабарламасында.

Сондай-ақ, мемлекет тарапынан тұрғын үй алу мәселесіне қатысты қолдауға қатысты қанағаттанғандардың үлесі өскен. Толық қанағаттанғандар 22,5%-дан 24,5%-ға дейін артса, жартылай қанағаттанғандар 36,2%-дан 36,5%-ға көбейген. Мемлекет тарапынан көрсетілетін қолдауға толық қанағаттанбағандар саны 24,9%-ды құрап, 14,1% респондент жауап беруге қиналған.

Фото: Жансерік Күзембай