"Өнер қырандары" театрының актері Мадияр Серікбаев жұбайынан ерекше сыйлық алды. Дана Тұрарбек күйеуіне көптен бері армандап жүрген Li маркалы автокөлігін тарту етіп, қуанышты сәттің видеосын әлеуметтік желіде жариялады, деп хабарлайды Malim.kz.
"Адал жарыма арманындағы көлік. Осы күнге жеткізген Аллаға шүкір", – деп жазды ол.
Желіге тараған видеода Мадияр Серікбаевтың тосын сыйды көрген сәттегі әсері анық байқалады. Актер қуаныштан балаша шаттанып, жұбайын құшақтап, эмоциясын жасыра алмаған. Кейін жаңа көлігін айналып қарап, толқып, көз жасына да ерік берген.
Мадияр Серікбаев та өз кезегінде жарына алғысын білдіріп, әлеуметтік желідегі парақшасында:
"Барлық еркек бақытты болуға лайықты", – деп жазды.
Желі қолданушылары актерді жаңа көлігімен құттықтап, отбасыға ақ тілектерін арнады. Пікір жазғандардың бірі бұл сыйлықтың тек көлік емес, жұбайының еріне деген құрметі мен көңілінің белгісі екенін атап өткен.
"Осы көлікке қолы жетпей жүрген жоқ. Ең бастысы – жұбайының көңіл бөліп, осындай қуаныш сыйлағаны. Ер адамға әйелінің назары өте маңызды. Балаларынан да бетер. Бақытты болыңдар!" – деп жазды желі қолданушысы.
Еске сала кетейік, "Өнер қырандары" театры Шымкент қаласында жоспарланған концерттің өтуіне кедергі келтіріліп отырғанын мәлімдеген еді. Сондай-ақ театр актері Меліс Наурызбеков денсаулығына қатысты мәлімдеме жасап, қазіргі жағдайы туралы айтқан болатын.
"Өнер қырандары" театры туралы
"Өнер қырандары" – Қазақстандағы танымал әзіл-сықақ және театрлық ұжымдардың бірі. Ұжымның негізі 2007 жылы қаланды. Ал 2008 жылдан бастап олар театр ретінде тұрақты жұмыс істей бастады. "Өнер қырандары" алғашқы шығармашылық қадамын КВН сахнасынан бастаған. Кейін өнерпаздар әзіл-сықақ қойылымдары арқылы кең көрерменге таныла түсті.
Театрдың басты ерекшелігі – жеңіл күлкімен қатар ой салатын тақырыптарды көтеруі. Олардың қойылымдарында отбасы, қоғам, тәрбие, адамгершілік, имандылық және ұлттық құндылық мәселелері жиі қозғалады. Ұжым мүшелері сахнада тек күлдіруді емес, көрерменге ой тастауды да мақсат етеді.
"Өнер қырандары" әр жылдары отандық телеарналардағы түрлі жобаларға қатысып, халық ықыласына бөленді. Театр құрамындағы өнерпаздардың көбі кәсіби сахна мектебінен өткен актерлер ретінде танылған. Ұжым жетекшілерінің бірі ретінде Мадияр Серікбаевтың есімі жиі аталады. Ол театрдың сахналық қойылымдары мен шығармашылық бағыты арқылы көрерменге кеңінен танылды.
"Өнер қырандары" тек концерт берумен шектелмей, қайырымдылық шараларына да атсалысып келеді. Мәселен, "Берекелі мереке" сияқты жобалар арқылы мұқтаж жандарға қолдау көрсетуге бағытталған кештер ұйымдастырылған. Мұндай бастамалар театрдың қоғам алдындағы жауапкершілігін көрсетеді.
Ұжымның қойылымдары Қазақстанның түрлі өңірінде сахналанып, көрермен тарапынан жылы қабылданды. 2023 жылы театрдың құрылғанына 15 жыл толғаны туралы да айтылды. Бұл уақыт ішінде "Өнер қырандары" әзіл әлемінде өзіндік орны бар шығармашылық ұжымға айналды. Кейінгі жылдары театр мүшелері сахнамен қатар кино саласына да қадам жасай бастады. Бүгінде "Өнер қырандары" халыққа күлкі сыйлап қана қоймай, ұлттық рух пен тәрбиелік мәні бар дүниелерді насихаттап жүрген өнер ұжымы ретінде танылып отыр.
