«Ақ жол»: Жасырын дауыспен Тоқаев жеңді
Президент сайлауы қарсаңындағы комедиялық қойылымдар басталып кетті
«Ақ жол» демократиялық партиясы президент сайлауында Қасым-Жомарт Тоқаевтың кандидатурасын қолдайды.
Партияның кезектен тыс ХІХ съезінде президент сайлауына қатысуға Мәжіліс депутаты Серік Ерубаев, жетісулық журналист Сандуғаш Дүйсенова және «Ақ жолдың» Ақтөбе облыстық филиалының төрағасы Асқар Садықов ниет білдірген.
Ақыры партия мүшелері Тоқаевқа тоқтапты.
Жасырын дауыс беру нәтижесінде Сандуғаш Дүйсенованы 11 адам, Серік Ерубаевты – 23, Асқар Садықовты 17 адам қолдаған. Қасым-Жомарт Тоқаевтың кандидатурасын 74 адам құптайтынын білдірді.
Партия төрағасы сыртқы саясатта түрлі сын-қатерлер барын, одан елімізді Тоқаев қана сақтап қалатынын айтты. Перуашев партияның көзқарасын қазіргі президентпен үндестіріп отыр.
Еске салайық, «Ақ жол» партиясының атынан 2019 жылғы Президент сайлауына Дания Еспаева қатысқан. Ол сол кезде «өз жеңісіме сенімдімін» деп Тоқаевпен бірге бақ сынап көрген. Оңбай жеңілген соң ба екен, бұл жолы Еспаева Тоқаевты қолдаушылар арасында отыр.
