Ақтауда жұмысшылар жолды бөгеп, митингке шыққан

Ақтаудағы «West Recycling Company» ЖШС (WRC) коммуналдық компанияның жұмысшылары жалақыны көтеруді талап етіп, жолды жауып тастаған. Олардың ереуілдеген видеосы әлеуметтік желілерде таралды.

Кейбір мәліметтерге қарағанда, Ынтымақ алаңының маңында жиналған жүзге жуық жұмысшы көліктер өтетін жол 15 минуттай бөгеп, митингке шыққан.

Маңғыстау облысының әкімдігінің хабарлауынша, наразылыққа шыққандар West Recycling Company компаниясының жұмысшылары. Олар Ақтауды санитарлық жағынан тазалаумен айналысады. Аталған серіктестік Ақтау қаласын санитарлық тазалаумен айналысады.

«Бүгінде жалақымыз 80-90 мың теңге, бұл ешеңеге жетпейді», – дейді жұмысшылар.

– Қызметкерлер жалақыны көтеру туралы талап қойды. Олар жолды жауып тастауға тырысты. Осыдан соң олардың алдына облыс әкімінің орынбасары Бекбол Орынбасаров барып, заңсыз акцияға шыққандарын айтып, түсіндіру жұмыстарын жүргізді. Осыдан кейін тұрғындарды келіссөздерге шақырды. Қазіргі уақытта жол ашылған. Наразылыққа шыққандар облыс әкімінің орынбасарымен бірге жиналысқа қатысуда, – деп хабарлады облыс әкімдігінің баспасөз қызметі.

Көлік апатының алдын алу және мәселені шешу үшін облыс әкімдігінен адамдар шақырылған. Соңғы жарияланған видеоларға қарағанда, қала жолдарындағы қозғалыс қалпына келген.