Азат Перуашев орынбасарының ұсталуына қатысты пікір білдірді

«Ақ жол» партиясының төрағасы Азат Перуашев өзінің орынбасары Дмитрий Васильевке қатысты пікір білдірді.

Естеріңізге сала кетсек, әлеуметтік желіде партия төрағасының орынбасары, кәсіпкер Дмитрий Васильев пен генерал-майор Константин Воронкиннің ұсталғаны туралы ақпарат тараған болатын. Жұртшылық Дмитрий Васильев Ұлттық гвардияның генералына пара берген деген бейресми ақпаратты талқылап жатыр.

Азат Перуашев тілшілердің осы жағдайға қатысты қойған сұрағына жауап беріп, орынбасарының ұсталғанын растады. Айтуынша, БАҚ-та жарияланған ақпараттан кейін партия Ұлттық қауіпсіздік комитетіне ресми сұрау салған.

- 10 қыркүйекте Васильевтің ұсталғаны туралы ресми жауап алдық. Бізге оның адвокаттарының байланыс деректерін берді, бірақ біз әлі олармен байланысқа шыға алмай отырмыз. Жағдайдың анық-қанығына тек сол адвокаттармен сөйлескеннен кейін ғана жете аламыз. Ал әзірге Васильевтің қандай бап бойынша ұсталғаны нақты белгісіз, - деді Перуашев.

Партия төрағасы ресми хат-хабарлардан әлдебір ақпарат тарап кетіп, соған байланысты Ұлттық гвардияның лауазымды тұлғасына «пара алды» деген айып тағылып отыруы мүмкін деген болжам айтты.

- Бұл жерде әңгіме нақты не туралы екенін түсініп алу керек. Қылмыстық кодекстің 367-бабына сәйкес, пара беруге мәжбүр болған тұлға қылмыскер болып саналмайды. Сондықтан пара беруді немесе алуды кім бастағанын түсіну керек, Васильев пе, әлде ол бопсалаудың құрбаны болды ма, - деп ойымен бөлісті Перуашев.

Айта кетсек, соңғы кезде «Ақ жол» партиясына қатысты түрлі оқиғалар болып жатыр. Жақында ғана партия төрағасы Азат Перуашев депутаттық мандатынан айырылған Асқар Садықовты Парламентте істейтін әйелге жыныстық бопса жасаған деп айыптаған болатын. Енді өзінің орынбасары ұсталды. Асқар Садықов та үнсіз қалмай, «Азат Перуашев өзінің орынбасарының Ұлттық гвардияның генералына пара бергені туралы ақпаратты жасырып қалғысы келіп, ақпарат ауанын маған бұруға тырысқан сияқты» деген ойын айтты.

Фото: «Ақ жол» партиясының баспасөз қызметі