Қазақстандағы ең ықпалды 50 бизнесменнің тізіміне кіретін Кеңес Рақышевті көпшілік қаржы және инвестиция саласындағы бизнесмен ретінде біледі. Алайда көпшілік Кеңес Рақышевтің Ұлыбританияда ұстара бизнесі бар екенін біле бермейді.
Қазақстанның Ресейдегі бұрынғы елшісі, бүгінде зейнетке шыққан Иманғали Тасмағамбетовтің күйеубаласы "Fincraft" инвестициялық үйі" АҚ-ның 50 пайызына, "Fincraft Resources" АҚ-ның 95 пайызына және БТА банкті басқаратын, БТА активтерін қайтарумен айналысатын "Fincraft Group" ЖШС-ның 100 пайыз акциясына иелік етеді. Рақышевке Румынияда алтын өндіретін Romaltyn Mining SRL және Romaltyn Exploration SRL компаниялары тиесілі. Forbes Kazakhstan Кеңес Рақышевтің дәулетін 890 миллион долларға бағалаған.
2010 жылдары Кеңес Рақышев бизнестегі позициясын күшейтіп, ел іші мен шетелде қаржы құюға болатын бизнесті іздей бастаған. Қытай, Түркия мен елде ферроқорытпа, хром никель өндіретін зауыттар сатып алып, SAT&Company холдингінің басты акционері атанды.
АҚШ-та жоғары технологияларлық Net Eement компаниясының акционері әрі директорлар кеңесінің төрағасы болды, 2012 жылы осы компания NASDAQ-қа шықты.
Рақышев венчур саласындағы бизнеске ақшасын құйып, 2013 жылы "Астана қаржы банкінің" акционеріне айналды.
Қаржысын әртүрлі салаға инвестициялаған Рақышев осы кезде ақшасын салуға болатын шағын әрі инновациялық бизнесті іздей бастағандай. Бұл уақытта Рақышев әзірге блокчейн технологиясымен жұмыс істейтін смартфон мен компьютер жобасын бастай қойған жоқ. Бірақ әртүрлі салада бизнес жүргізіп көрген Кеңес Рақышев бұл жолы Англияда ұстара шығаратын шағын бизнеске азын-аулақ ақша салып көрмек болды. Сөйтіп, 2013 жылы британдық өзге үш бизнесменмен бірігіп, әрқайсысы небәрі 100 фунттан құйып, Evoshave limited компаниясын құрды.
Лондонда қырынуға арналған бұйымдарды шығаратын шағын ғана Evoshave limited компаниясына Рақышев тікелей өзі емес, БТА банк сатып алған Сингапурда тіркелген Novatus Holding Pte Ltd арқылы иелік ете бастады. Әлбетте, Evoshave limited дәл инвестиция саласындағы ірі бизнес тәрізді табысты болмаса да, ірі акционердің нан-тұзын ажыратуға жететіндей табыс береді. Қырынуға арналған бұйымдардың дизайнын жасап, бұйымдарды сататын Evoshave limited-тің ағымдағы таза активтері 2019 жылы 2 миллион фунт стерлингтен асты.
Кеңес Рақышев 2013 жылдан бері Evoshave limited компаниясы директоры қызметін атқарады. Компанияның одан өзге тағы бес директоры бар. Алайда Ұлыбританиядағы бизнес реестріндегі мәліметке қарағанда, Кеңес Рақышевке Evoshave limited-тің кемінде 50 пайыздан астам үлесі тиесілі.
Evoshave limited 2012 жылы құрылған. 2019 жылы Evoshave limited-тің ағымдағы жалпы активтері 2 млн фунт стерлингке жеткен, ал 2018 жылы бұл көрсеткіш 784 млн фунт стерлингке тең болған. Яғни компанияның активтері бір жылдың ішінде үш есеге жуық өскен.
Evoshave сайтына қарағанда, компания ерлер мен әйелдерге арналған тұтқасы жоқ, сұқ және ортаңғы саусаққа кигізілетін арнайы ұстаралар шығарады. Бір ұстара құны шамамен 5 фунт шамасында.
Әрине, алтын өндіру мен инвестиция саласында қыруар табыс тауып жүрген Кеңес Рақышев үшін ұстара мен қырынуға арналған бұйымдар шығару хобби тәрізді шағын бизнес екені түсінікті. Десек те құжаттарға қарағанда, осы шағын бизнестің акционері атану үшін Рақышевтің Novatus Holding Pte Ltd компаниясы 1,4 миллион фунт құйған. Осылайша 2013 жылы небәрі 100 фунт стерлинг құюдан басталған компания бүгінде табысты бизнеске айналды, оның акционерлері де көп. Алайда олардың ішіндегі ең ірісі – Кеңес Рақышев.
Мақаланы көшіріп басуға болмайды.
MalimBlocks
