Матаевтар. Назарбаевтың Қазақстаны келтірген зиянды Жаңа Қазақстан өтей ме?

Жоғарғы сот қазақстандық белгілі журналистер әкелі-балалы Сейітқазы және Әсет Матаевтарды толықтай ақтады. Бұл туралы "ҚазТАГ" хабарлады.

«Жоғарғы сот сейсенбі күні Астана қаласы сотының Сейітқазы және Әсет Матаевтарға қатысты 9 желтоқсан 2016 жылғы үкімінің күшін жойды. Үкім оқыған судья Матаевтардың ақталғанын, сонымен қатар қылмыстық процессті жүргізген органдардың заңсыз әрекеттері негізінде келтірілген зиянды талап ету құқығына ие болды», - деп жазады агенттік.

Сейітқазы, Әсет Матаевтар 2016 жылы сотталған. Сот екеуіне дүние-мүлкі кәмпескелеу арқылы 6 және 5 жылға бас бостандығынан айыру туралы үкім кескен. Ал, Сейітқазы Матаевқа өмір бойы кәсіпкерлік қызметпен айналысуға тыйым салған.

Сейітқазы Матаев пен «ҚазТАГ» ақпараттық агенттігін басқаратын ұлы Әсет Матаевқа «аса ірі көлемде бюджет қаражатын жымқырды және аса ірі көлемде салық төлеуде жалтарды» деген айып тағылды. Сейітқазы Матаевқа ҚР ҚК-нің 190-бабы 4-бөлімі 2-тармағы, 245-бабының 3-бөлімі 177-бабы 4-бөлімі "б" тарбағы бойынша; Әсет Матаев ҚР ҚК-нің 190-бабы 4-бөлімі 2-тармағы бойынша айыпталған. Екеуі де бұл айыппен келіспейтінін білдірген.

Бір жылдан кейін Сейітқазы Матаев рақымшылыққа ілігіп, жазасын өтеу мерзімі қысқарып, ақыры 2017 жылы мерзімінен бұрын босату туралы өтініші қанағаттандырылып, босап шыққан.

Әкелі-балалы Матаевтар қамауға алынғанда отандық және шетелдік БАҚ-тарда бұл «сөз бостандығына жасалған қысым» ретінде жиі талқыланған.

Матаевтар Назарбаев дәуірінде айыпталып, Тоқаев президенттігі кезінде ақталды. Сот олардың шеккен зиянын өтеуді талап ету құқығы бар екенін айтты, енді олар бұл зиянды кімнен талап етеді? "Ескі" Қазақстан тигізген зиянды "Жаңа Қазақстан" өтей" ме?