Қазақстандықтар Кипрге визасыз баруы мүмкін
Наурыздың 25-күні Қазақстанға ресми сапармен Кипр республикасының сыртқы істер министрі Константинос Комбос келді. Ол Қазақстан премьер-министрінің орынбасары, сыртқы істер министрі Мұрат Нұртілеумен де кездесті.
Кездесуде тараптар екі ел арасында визасыз режим енгізуді талқылап, «Әуе қатынасы туралы» меморандумға қол қойды.
«Соңғы үш онжылдықта елдеріміз арасында барлық деңгейлерде ашық саяси диалог орнады, белсенді сауда және инвестициялық ынтымақтастық, сондай-ақ БҰҰ сияқты халықаралық ұйымдар шеңберінде жемісті өзара іс-қимыл жолға қойылды. Өзара құрмет пен сенімге негізделген Қазақстан мен Кипр арасындағы берік және тығыз достық біздің сыртқы саясатымызда ерекше орын алады», – деп мәлімдеді Мұрат Нұртілеу.
Министр Константинос Комбос та екі елдің қарым-қатынасын жоғары бағалап, Қазақстан Орталық Азиядағы Кипрдің маңызды серіктесі екеніне тоқталды. Сонымен бірге Комбос Астанада Кипр республикасының елшілігі ашылатынын мәлімдеді.
Фото: @PressMFAKZ телеграм каналынан
