Үкімет «Қазақтелеком» акционерлік қоғамының кейбір мәселелері туралы қаулы қабылдады. Қаулы бойынша "Қазақтелекомның" 28 пайыз акциясы мемлекет меншігіне қайтарылды. Бұл туралы Үкімет үйінің баспасөз қызметі хабарлайды.
«Сыйға тарту шарты бойынша «Қазақтелеком» акционерлік қоғамының жарғылық капиталының 24,95%-ын құрайтын 2 671 481 жай акциясын республикалық меншікке беру туралы Skyline Investment Company S.A. жеке компаниясының ұсынысы қабылдансын», - делінген қаулы мәтінінде.
Бұдан бөлек «Alatau Capital Investment» ЖШС сыйға тарту шарты бойынша қоғамның жарғылық капиталының 3,85%-ын құрайтын қоғамның 413 412 жай акциясын республикалық меншікке өткізеді.
Сыйға тарту шарты бойынша акциялардың 24,95%-ын Skyline Investment Company S.A, ал тағы 3,85%-ын Alatau Capital Investment береді.
Аталған екі компания да Нұрсұлтан Назарбаевтың немере інісі Қайрат Сатыбалдыға тиесілі.
Сатыбалды 13 наурызда лауазымдық өкілетін асыра пайдалану және «Қазақтелеком» АҚ-ның қаражатын аса ірі көлемде ұрлау фактілері бойынша ұсталып, тұтқындалды.
MalimBlocks
