Шымкентте бұрынғы жергілікті полиция қызметкері ұсталды
Ол қызмет бабын пайдаланып, алаяқтық жасау бойынша тергеуге алынған.
Шымкент қаласы Полиция департаменті жергілікті полиция қызметінің бұрынғы бастығы ұсталып, уақытша ұстау изоляторына қамалды. Қазір оған қатысты сотқа дейінгі тергеу жүріп жатыр.
Жергілікті полиция қызметінің экс-бастығы қызмет бабын пайдаланып, алаяқтық жасау бойынша тергеуге алынған. Бұл туралы Шымкент қаласының Сыбайлас жемқорлыққа қарсы қызметі хабарлады.
Бұған дейін М. Бұхарбаевтың қоластындағы полиция қызметкері әлеуметтік желіде оның ақша жинауға мәжбүр еткенін айтқан.
«Биылғы жылдың 25 сәуірінде М. Бұхарбаев қылмыстық іс жүргізу кодексінің 128, 131-баптарының тәртібінде ұсталып, уақытша ұстау изоляторына қамалды. Сотқа дейінгі тергеу жалғасуда. Өзге ақпарат қылмыстық іс жүргізу кодексінің 201-бабына сәйкес жария етуге жатпайды»,- деп жазылған департамент таратқан хабарламада.
