Республикалық арналардан халыққа мәлімдеме жолдаған президент Қасым-Жомарт Тоқаев зейнетақы, атаулы әлеуметтік көмек пен мемлекеттік жәрдемақы өсетінін мәлімдеді.
"Инфляцияның артуына байланысты зейнетақы, мемлекеттік жәрдемақы және атаулы әлеуметтік көмек мөлшерін 10 пайызға индексациялауды тапсырдым.Осыған орай, аталған санаттағы азаматтардың табысын арттыру үшін мемлекет тарапынан 200 миллиард теңгеден астам қаражат бөлінеді", – деді Тоқаев.
Сондай-ақ президент 42 500 теңге көлеміндегі жәрдемақы алушылардың тізімі кеңейіп, көмекті 3 миллион адам алатынын мәлімдеді. "Табысынан айырылған азаматтарға ең төменгі жалақы мөлшерінде қолдау көрсеттік. Енді, 42500теңге көлеміндегі осы көмекті алатын азаматтардың санатын кеңейтуді тапсырамын. Соған орай, бұл қолдауға өзін-өзі жұмыспен қамтығандар мен ресми тіркелмей жұмыс істейтіндер де ие болады. Бұл көмек белгіленген тәртіп бойынша шын мәнінде мұқтаж адамдарға ғана беріледі. Жалпы, 3 миллионға жуық азаматымызға қолдау көрсетіледі.", - деді ол.
Тоқаевтың айтуынша, шағын және орта бизнес өкілдері осы жылдың 1 қазанына дейін еңбекақы төлеу қорынан ұсталатын салықтан босатылады. Бұл сауда, қонақ үй, туризм, көлік қызметі және т.б. салаларды қамтымақ.
Ал ауыл шаруашылығымен айналысатын кәсіпкердерге қолдау ретінде 70 миллиард теңге бөлінбек.
Тоқаев бұған дейінгі мәлімдемесінде 42 500 теңге көлеміндегі жәрдемақыны 1,5 миллион адамға берілетінін айтқан. Естеріңізде болса, Malim.kz сайты мұның сыртында зейнетақы қорына жарна аудармайтын, салық төлемейтін көлеңкелі жұмыс істейтін 1,4 миллион адам бұл жәрдемақыға іліне алмай, сырт қалатынын талдап жазған. Тоқаевтың бүгінгі мәлімдемесінде "енді көмек 3 миллион адамға беріледі" дегеніне қарағанда, билік бұл сыннан сабақ алып, жәрдемақы алушылардың тізімін кеңейткен.
Оқи отырыңыз: "Бір жарым миллион ақщасыз қазақ нан-тұзсыз қалуы мүмкін"
Байланысты жаналықтар
MalimBlocks
