Үнемшіл Үкіметбасы!  Мектепке керек бейнебақылау сайлауға керек емес...

Екі күн бұрын Петропавлда  мектепке  пышақ, балтамен қаруланып келген 9-шы сынып оқушысы шабуыл жасап, үш баланы жарақаттаған еді. Кейін оның психиатриялық есепте тұрғаны белгілі болды. Ал дәрігерлер балаларға операция  жасалғанын  айтып, қазір жағдайлары тұрақты екенін жеткізді.  Білім ордаларында қауіпсіздік мәселесі талайдан бері көтеріліп келеді. Осындай келеңсіз жайттардан соң ғана шенеуніктердің оянатын әдеті. Күні кеше  премьер-министр Әлихан Смайылов министрліктерге арнайы тапсырма берді. Ол   мектептерде бейне камералардың санын көбейтіп, кіреберісте бақылауды күшейту қажет деді. Жалпы, қазір қай салада болмасын, қауіпсіздікті күшейтетін уақыт. Осы ретте бейнекамераларды орнату екібастан керек. Смайылов жиі айтатын ашықтық, әділдік бойынша да аталған жүйенің қажеттігі зор. Әсіресе, алда келе жатқан сайлауда. 

Өткенде депутаттар әр сайлау учаскесіне бейнебақылау қондыру туралы ұсыныс айтқан болатын. Сол кезде  ғана саяси науқанда бұра тартушылық   болмайды дегенді еске салған.

Бірақ, мектепке камера қоюға құлшынған Премьер-министр үшін  сайлау уческелеріне бейнебақылау қою тиімсіз екен.   Бүгін аталған ұсынысқа қайыра оралған ол сайлау учаскелерінің бәріне видеокамера орнатуды жөн санамады.  Смайылов үшін  экономикалық жағынан «тиімсіз әрі орынсыз» екен.  Оның сөзінше,  «заңға сәйкес азаматтың немесе оның заңды өкілінің келісімі болған кезде ғана дербес деректерді жалпыға қолжетімді көздерде таратуға жол беріледі». Әлем елдері Ұлыбритания, АҚШ, Канадалар тәжірибенің тиімсіздігін байқапты-мыс!  Үкімет қаржысын үнемдейтін  бейнекамералар енді мектептерге толықтай жетсе игі... Үнемдеу соңы үйдей пәлеге ұрындырмасын!  

Фото: Б.Бесбаев