Қазақстанның батысындағы шекараны заңсыз кесіп өткен үш шетелдік ұсталды, - деп хабарлайды БҚО сотының баспасөз қызметі.
Жәнібек аудандық соты үш шетел азаматына қатысты "Қазақстан Республикасының Мемлекеттік шекарасын қасақана заңсыз кесіп өту" бабы (ҚК 392-бабы 1-1-бөлігінің 1-тармағы) бойынша қылмыстық істі қарады.
Жәнібек аудандық соты анықтағандай, 2025 жылғы 3 желтоқсанда сағат 21:30 шамасында ер адамдар Ресей тарапынан Қазақстан шекарасын заңсыз кесіп өткен. Олар "Қайрат" шекара бекеті аумағындағы екі қатарлы сым қоршаудан асып түскен.
Келесі күні таңертең олар Тау ауылына келіп, қараусыз қалған ғимаратты паналаған. Бір сағаттан соң жергілікті тұрғынның хабарлауы бойынша оларды полиция қызметкерлері ұстады.
Сотта сотталушылар кінәсін толық мойындады. Олар өз елдеріне — Тәжікстан мен Өзбекстанға туыстарына қайтқысы келгенін түсіндірді. Айтуларынша, оларды соғыс қимылдарына қатысуға мәжбүрлегендіктен, бастарын қатерге тіккісі келмеген.
Мемлекеттік айыптаушы үшеуіне де бас бостандығынан айыру жазасын тағайындауды сұрады.
Нәтижесінде сот оларды кінәлі деп таныды. Екі ер адам 6 айға бас бостандығынан айырылып, кейін Қазақстан аумағынан шығарылатын болды. Үшіншісіне 350 АЕК (1 376 200 теңге) көлемінде айыппұл салынып, елден шығару туралы үкім кесілді.
Үкім заңды күшіне енді.
