Ресей әскері 12 ақпанға қараған түні баллистикалық зымырандар мен дрондарды қолданып, Киев, Одесса, Днепр және Павлоград қалаларына соққы жасады, деп хабарлады өңірлік билік өкілдері.
«Жау астананың инфрақұрылым нысандарына баллистикалық зымырандармен соққы беруде», – деп хабарлады түнде Киев мэрі Виталий Кличко. Әуе қаупі жарияланғаннан кейін қалада бірнеше қатты жарылыс дауысы естілді. Кличконың мәліметінше, Дарницкий ауданында зымыран жеке тұрғын үйге тиген, ал Голосеевский және Деснянский аудандарында – тұрғын емес ғимараттарға түскен. Зымыранның сынықтары Днепровский ауданындағы тұрғын үйдің маңына да құлаған.
Киевке жасалған шабуыл салдарынан екі адам зардап шекті. Олардың бірі ауыр халде ауруханаға жеткізілді, екіншісіне медициналық көмек оқиға орнында көрсетілді.
Кейінірек қала мэрі түнгі шабуыл нәтижесінде Киевте тағы шамамен 2600 үй жылусыз қалғанын хабарлады. «Еске саламын, Деснянский және Дарницкий аудандарындағы 1100-ден астам көпқабатты үй алдыңғы шабуылдардан кейін де жылусыз отыр, – деп жазды Кличко Telegram-да. – Дарницкий ЖЭО-ның аса ауыр зақымдануына байланысты ол жаққа әзірге жылу тасымалдағышты беру мүмкін емес».
Днепропетровск облысында жаңа туған сәби жараланды
Днепропетровск облысында баллистикалық зымырандар мен ұшқышсыз ұшу аппараттары Днепр және Павлоград қалаларын атқылады, деп хабарлады облыстық әскери әкімшіліктің басшысы Александр Ганжа. Шабуыл салдарынан төрт адам жарақат алды, олардың ішінде төрт жасар бала және ауруханаға жеткізілген жаңа туған сәби бар.
