Сенат депутаттары жануарларға жауапкершілікпен қарау туралы заңға енгізілген бірқатар түзетулерді қайта қарап, құжатты Мәжіліске қайтарды, деп хабарлайды Malim.kz.
Ең көп талқыланған нормалардың бірі - бұралқы жануарлар санын реттеу кезінде «эвтаназия» терминін қолдану мәселесі болды. Сенат бұл терминнен бас тартуды ұсынды.
Мәжіліс қабылдаған нұсқада иесіз жануарлар панажайға немесе уақытша ұстау пунктіне жеткізілгеннен кейін бес тәулік өткен соң эвтаназия қолданылуы мүмкін екені қарастырылған еді. Бұл норма қоғамда қызу талқыланып, зооқорғаушылар мен азаматтардың сынына ұшырады.
Сенатор Арман Өтеғұлов заң жобасының қоғамда кең резонанс тудырғанын атап өтті.
«Бүгін біз тек жануарлар санын бақылау мәселесін ғана емес, адамгершілік, жауапкершілік және қандай қоғам қалыптастырып жатқанымыз туралы айтып отырмыз», - деді сенатор.
Сенат сондай-ақ бес күндік мерзімді міндетті норма ретінде бекітуден бас тартуды ұсынды. Енді иесіз жануарлар санын реттеу тәртібі мен мерзімін әр өңірдің мәслихаттары жергілікті жағдайға қарай айқындауы мүмкін.
Құжатта микрочипі жоқ иттер мен мысықтарды автоматты түрде иесіз жануарлар қатарына жатқызу туралы ұсыныс та қайта қаралды. Сенаторлардың пікірінше, чиптің болмауы жануардың иесі жоқ екенін білдірмейді.
«Чиптің болмауы әрдайым жануардың иесіз екенін білдірмейді. Бұл үй жануарларының қате түрде иесіз деп танылуына әкелуі мүмкін», — делінген Сенат ұстанымында.
Сонымен қатар депутаттар жануар иелерінің жауапкершілігін күшейту қажеттігін атап өтті. Егер үй жануары адамның денсаулығына, басқа жануарларға немесе мүлікке зиян келтірсе, оның иесі келтірілген залалды өтеуге міндетті болады.
«Сенаторлар азаматтардың қауіпсіздігі, жануар иелерінің жауапкершілігі және жануарларға ізгілікпен қарау қағидаттарын қатар ескеретін теңгерімді ұстанымды қорғап келеді», - деп хабарлады Сенат.
Заң жобасы жануарларға жауапкершілікпен қарау саласындағы заңнаманы жетілдіруге, азаматтардың қауіпсіздігін арттыруға және жануарларға ізгілікпен қарау мәдениетін қалыптастыруға бағытталған.
Бұған дейін Мәжіліс депутаты Нұргүл Тау бір итке 74 мың, ал балаға 17 мың тг жәрдемақы беріліп жатқанын айтқан болатын.
