Фариза Төреәлі бір тәулікте оқырмандарынан 46 млн теңге жинап алған
Блогер оқырмандарынан көмек сұрады
![](/images/article-img/1600/23188-1720764251-m.png)
Әнші Төреғали Төреәлінің қарындасы, блогер Фариза Төреәлі туысының ауыр дертке шалдыққанын айтып, оқырмандарынан көмек сұрады, деп хабарлайды Malim.kz.
Блогердің айтуынша, туысы тез арада ота жасатуы үшін шетелге кеткен. Ол шетелдегі ем үшін көлемді қаражат керек екенін айтып, оқырмандарына үндеу жасады.
Алғашында Фариза Төреәлі 7 күнде 40 млн теңге жинау керек екенін жеткізді. Дегенмен, бұл сома бір күннің ішінде жиналған.
Блогердің парақшасындағы оқырмандардың белсенділігі сонша, сағат сайын жиналған ақшаның саны арта түсті. Осылайша, ол емге қажет болған 40 млн теңгені асырып, небары бір тәулікте 46 млн теңге жинап алған.
«Осымен ақша жинау тоқтады. Бір тәулікте – 46 млн теңге. Артығын емге жұмсайды. Қазір химия алып жатыр. Барлығы қымбаттап кеткен. Баршаңызға алғыс. Бір күнге жеткізбей, бір адамның әрі қарай өмір сүруіне себепші болып жатырсыздар. Алла Тағала мұны сіздерге екі еселеп қайтарады», - деп жазды Фариза Төреәлі.
Фото: instagram/farizatoreali