Мәдениетті құртып жатқан әншісымақтарға айыппұл салу керек – Саят Медеуов

Қазақстанның еңбек сіңірген қайраткері, танымал әнші Саят Медеуов сапасыз әндерді орындайтын әртістерді сынға алды. Бұл туралы ол «1001 түн» бағдарламасына берген сұхбатында айтты, деп хабарлайды Malim.kz.

Әншінің пікірінше, қазіргі таңда сахна деңгейі төмендеп, өнер сапасы құлдырап жатыр. Ол халық арасында танымал болып жүрген кейбір әндердің мағынасыз әрі мазмұнсыз екенін атап өтті.

Жеңіл әңгіме айтқым келмейді. Мәдениет саласында, өнерде мен күйіп кететін нәрсе көп. Қазір аузына келген сөзбен ән жаза беретін әншісымақтар қаптап кетті. Сапасыз әншілерден, сапасыз ән туады. Оларға ешқандай шектеу болып жатқан жоқ, сәйкесінше ойына келгенді жазады. Әннің сөзі әуенмен бірге төгіліп, поэзия секілді құйылып тұруы керек. Біз - композитор, ақын, әнші деген үш тағанды жоғалтып алдық. Баяғыда ән осы үш тағанның уысынан шығып, сәтті екенін дәлелдейтін. Қазір бәрі майдаланып барады, деп ашуланды Саят Медеуов. 

Өнер иесі мәдениетті құртып жатқандарға айыппұл салу керек деп отыр.

Болмайтын ән айтатын болмайтын әншілер көп. Бәрі демеймін. Арасында жақсы әншілер де бар. Бірақ сондай болмайтын ән айтатындарға айыппұл салу керек. Заңмен шектеп, олардың еркін көсілуіне жол бермеуіміз керек. Ақыры бәріне айыппұл салып жатырмыз ғой. Көлікті 5 минуттан артық қыздырғанға да айыппұл салып жатырмыз ғой, одан да өнерді ластап, мәдениетті құртып жатқан әнші сымақтарға айыппұл салғанымыз абзал, деді әнші. 

Фото: видеодан кадр