Астанаға көшіп келушілерге шектеу қойыла ма? Әкім жауап берді. 

Кейінгі уақытта Астана халқының тым көбейіп кеткендігі мәселе ретінде жиі көтеріледі.  Азаматтар арасында құрылысты тоқтату, көшіп келушілерді шектеу жөнінде көп айтыла бастады. Көпшілікті толғандырған бұл сұраққа қала әкімі Жеңіс Қасымбек Atameken business арнасына берген сұхбатында жауап берді.        

Әкімнің айтуынша, құрылысы басталған нысандар  11 млн шаршы метрге жеткен. Биылғы жоспар бойынша 3,5 млн шаршы метрі қолданысқа берілмек. Келесі жылы да осы көлемде тапсырылады.

«Әрі қарай миграциялық жағдайға байланысты шешім қабылдаймыз. Қаладағы халық саны өссе құрылыс жалғасады. Бірақ біз ешқандай да шектеу қоймаймыз.  Ауылдан көшіп келген азаматтар тұрақты, айлығы жоғары жұмыс орнын, балаларын жақсы мектепке, университетке оқытқысы келеді. Сондықтан, жыл сайын 40 мыңнан астам жұмыс орнын ашуды жоспарлап отырмыз. Әкімшілік 14 мектеп салып жатырмыз. Оның 11-і биыл іске қосылады. Жекеменшік мектептер де бой көтеруде. Биыл елордада тағы 24 мектептің құрылысы басталады. 2-3 жыл көлемінде 40 мектеп саламыз»,-дейді Жеңіс Қасымбек. 

Қала әкімінің мәліметінше, бұл 100 мың орындық білім мекемелерін қалыптастырады. «Жыл сайын мектептерге 25 мың шамасында оқушы келеді. Олардың саны өсіп жатыр. Сондықтан, кем дегенде 10 мектеп салуға тиіспіз», -деді ол.