Instagram көріп сотталды

Қашқындағы оппозиционер Мұхтар Әблязовке тікелей эфирде сұрақ қойғаны үшін сот Бостанбековаға тыйым салынған қозғалыс қызметіне (Қылмыстық кодекстің 405-бабының 2-бөлігі) «қатысу» үшін кінәлі деп тапты, деп хабарлайды Азаттық радиосы.

2022 жылдың 20 қарашасында өткен кезектен тыс президент сайлауы қарсаңында Жетісу облысы Ескелді ауданы Қарабұлақ ауылының тұрғыны Жібек Бостанбекова Қазақстанның соты экстремист деп танып, сырттай көп жылдарға сотталған Мұхтар Әблязовтың Instagram желісіндегі тікелей эфирге қосылған. Тікелей эфирге берген түсініктемесінде келіншек «мұғалімдер дауыстарды ұрлайды» деп айтып, Әблязовтен олар жауапқа тартыла ма, жоқ па деп сұраған.

Желтоқсан айында Бостанбекованың үйін тәртіп сақшылары келіп тінткен. Олар үйдегі барлық телефондарды (оның және отбасы мүшелерінің) тәркілеген. Осы тінтулер мен кейінгі тергеулердің нәтижесінде 21 маусымда әйелге қатысты сот процестері басталып, ол үйқамақта болды.

20 шілде күні кешке сот үкімін жарияланды. Сот Бостанбековаға үш жыл мерзімге қоғамдық-саяси қызметпен айналысуға тыйым салу, сондай-ақ сот шығындарын өтеу ретінде шамамен 250 мың теңге төлеу және «Жәбірленушілерге өтемақы қорына» 10 АЕК мәжбүрлеп төлеу түріндегі жаза тағайындады.

Бостанбекова Франциядағы оппозиционердің әлеуметтік желіде айтқан бағдарламасының ережелерімен шынымен келісетінін, бірақ оның әрекетін «экстремизм» деп санамайтынын айтты. Ол өзін оппозиционер емес екенін, осы уақытқа дейін митингілерге қатыспағанын және оны Тоқаевтың Қантар оқиғасы кезінде «ескертусіз ату» бұйрығынан кейін  Әбілязовтың желідегі парақшасына кіргенін айтты.

Үкім заңды күшіне енген жоқ. Заң бойынша үкiм жарияланған күннен бастап 15 күн iшiнде жоғары тұрған сотқа шағым түсіре алады. Бостанбекова үкімге апелляциялық шағым түсірмекші, бірақ адвокаттың ақысын өз бетімен төлеуге қаражаты жоқтығын, бірінші сатыдағы сотта оның мүддесін мемлекет (қылмыстық процесті жүргізетін органнан) қорғағанын айтады.