Дәрігер, нейрохирург Мыңжылқы Бердіқожаев елде вирус қатты тараса, қатаң карантин шаралары қайта енгізілуі мүмкін екенін айтты. Дәрігер бұл ойын өзінің Instagram-дағы парақшасында жеткізді.
"Еуропа мемлекеттерінде вирус қайта өршіп жатыр. Қазақстанда да солтүстік аймақтарда құс тұмауы тарап жатыр. Балабақша,мектептердегі балалар коронавирупен ауырып қалды деген хабарламаларды естіп қалып жатырмыз. Әрине, мектепті ашқан кезде балалар бір-біріне коронавирус жұқтырып, ары қарай таратуы мүмкін деген болжам болған еді. Сол болжам жүзеге асып жатқан сияқты. Балалар жеңіл түрде ауырады, бір-екі күн дене қызуы көтеріліп, жүгіріп кетіп жатады. Бірақ үйдегі үлкен кісілер немесе мектеп мұғалімдері ауырып қалу қаупі бар. Сондықтан мүмкін болса, қашықтан оқуды әлі де болса жалғастырған дұрыс", - деді дәрігер.
Ол, сонымен қатар, вирусты тоқтатуға ең қатты әсер ететін шараларды да атап өтті.
"Жарты жылдық карантин, пандемияны талдайтын болсақ, алғашқы карантинді ешкім түсінбей де қалған да болар. Бірақ екінші рет енгізілген карантин коронавирусты қалай тоқтатқанын немесе бәсеңдеткенін сараптайтын болсақ, локдаун мен арақашықтықты сақтау - коронавирустың тарауын тоқтатқан негізгі механизм. Ол өте әсерлі және тиімді. Бетперде кию мен қолд жуу да тиімді, әрине. Бірақ вирус тарауын тоқтатқан негізгі фактор – арақашықтық сақтау. Егер вирусты тарататын және оны қабылдайтын адам болмаса, вирус ауада қалады, ары қарай тарамайды".
Дәрігер елде той-томалақ, ас беру көбейіп кетті, ал бұл вирустың тарауына себеп болуы мүмкін дейді.
"Әрине, бұл салт-дәстүр, онсыз болмайды дейміз. Бірақ әр адамның денсаулығы – бұл Құдайдың берген сыйы. Соны қадірлеп, құрметпен қарау керек. Өз денсаулықтарыңызды күтіп, сақтауға әрекет етіңіздер. Мүмкін болса, арақашықтық сақтаған дұрыс. Ал елде локдаун, карантин бола ма, оны болжап айту қиын. Бірақ егер вирус қатты тараса, оны тоқтату үшін карантин шаралары қайта енгізіледі деген болжам бар", - деді М.Бердіқожаев.
Байланысты жаналықтар
MalimBlocks
