Маңғыстау облысының әкімі арандатушыларға ермеуге шақырды
"Тыныштықты бұзуға жол бермеуіміз керек",-дейді ол.
Маңғыстау облысының әкімі Нұрлан Ноғаев Астанаға арнайы келіп, жұмыс талап етіп, минингке шыққан жаңаөзендіктерге қатысты мәлімдеме жасады. Әкім халықты арандатушыларға ермеуді, сабыр сақтауға шақырды.
"Қоғамдағы шиеленісті одан әрі ушықтыру заң мен құқықтық нормаларды бұзу бұл жағдайдың тұрақсыздануына әкеледі. Мәселені шешпейді...
... Баршаңызды ел тыныштығын бұзбауға шақырамын. Қазір әсіресе арандатушыларға еріп кетпей, олардың ел ішіне іріткі салып, тыныштықты бұзуына жол бермеуіміз керек. Кәсіпорындарда тыныштық пен тұрақтылықтың болғаны бәріміз үшін тиімді" деді Ноғаев.
Айта кетейік, кеше жаңаөзендік бір топ азамат тұрақты жұмыс беруді талап етіп Астанаға келген еді. Сағат 22.00 шамасында Астана полициясы "кешеден бері рұқсатсыз митинг ұйымдастырған және белсене қатысқан" деп шерушілерді ұстап әкеткен. Жаңаөзендегі кәсіпорындардың жұмысшыларды оларды босатуды талап еткен соң, ереуілшілер бостандыққа шықты.
