Шымкентте 21 жастағы Нұрай Серікбайдың өліміне қатысты іс бойынша күдіктіге тағылған айыптардың бірі қатаңдатылып, оған өмір бойына бас бостандығынан айыру жазасы тағайындалуы мүмкін, деп хабарлайды Malim.kz.
Жәбірленуші тараптың адвокаты Сержан Нұрпейісовтің мәлімдеуінше, тергеу барысында күдіктінің әрекеті қайта сараланған.
"Қылмыстық іс Қылмыстық кодекстің 99-бабы 2-бөлігінің 5-тармағына – ерекше қатыгездікпен жасалған кісі өлтіру бабына ауыстырылды", – деді адвокат.
Аталған бап бойынша 15 жылдан 20 жылға дейін бас бостандығынан айыру немесе мүлкін тәркілей отырып не онсыз өмір бойына түрмеге қамау жазасы қарастырылған.
Қазіргі таңда іс Қылмыстық кодекстің үш бабы бойынша тергеліп жатыр:
- 99-бап, 2-бөлім, 5-тармақ – ерекше қатыгездікпен адам өлтіру;
- 125-1-бап – некеге тұруға мәжбүрлеу;
- 115-1-бап – сталкинг.
Еске салайық, қайғылы оқиға 11 қаңтар күні кешкі уақытта Шымкентте болған. Күдікті Нұрай Серікбайды пышақтап өлтіріп, оқиға орнынан қашып кеткен. Ол екі күннен кейін ұсталған.
Тергеу деректеріне сәйкес, күдікті 2025 жылдың қазан айында марқұмды еркінен тыс алып қашқан. Бұл әрекетке Нұрай да, оның отбасы да қарсы болған. Аталған дерек бойынша полицияға арыз түсіп, күдікті бұдан былай қызға жоламайтынына уәде бергеннен кейін, марқұм оған кешірім бергені белгілі болды.
Ішкі істер министрлігі бұл қылмыстық істі ерекше бақылауға алып, арнайы жедел-тергеу тобын құрғанын хабарлады.
