Қасым-Жомарт Тоқаев Жамбыл Жабаевтың туғанына 180 жыл толуына арналған салтанатты жиын қатысушыларына құттықтау жолдады, деп хабарлайды Malim.kz.
Мемлекет басшысы жыр алыбы Жамбыл Жабаевтың қазақ руханиятындағы орны айрықша екенін атап өтті.
«Әйгілі жыршы шоқтығы биік шығармалары арқылы отаншылдық пен ынтымақ, ерлік пен елдік, адалдық пен әділдік секілді мызғымас құндылықтарды кеңінен дәріптеді. Халқымыздың біртуар перзенті айтыс өнерінің өрісін кеңейтуге, эпикалық дәстүрді жаңғыртуға, қазақ-қырғыз әдеби байланысын нығайтуға өлшеусіз үлес қосты.», – делінген құттықтауда.
Президент ақын мұрасы әлі талай ұрпаққа рухани азық болатынын айтып, мерейтой аясындағы іс-шаралардың мазмұнды өтуіне тілектестік білдірді.
