АҚШ президенті Дональд Трамп Оманға қатысты қатаң мәлімдеме жасап, ел Ормуз бұғазындағы АҚШ әрекеттеріне кедергі келтірсе, соққы жасалуы мүмкін екенін айтты. Бұл туралы ол Иранмен жасалған бітім мерзімі аяқталуға бір күн қалғанда Fox News телеарнасына берген сұхбатында мәлімдеді, деп хабарлайды Malim.kz.
Бұған дейін Тегеран Ормуз бұғазындағы кеме қатынасын қайта жандандыру мәселесі бойынша Оманмен келіссөз жүргізіп жатқанын хабарлаған.
Ормуз бұғазы әлемдегі мұнай тасымалы үшін стратегиялық маңызы бар негізгі теңіз жолдарының бірі саналады. Сондықтан аймақтағы кез келген шиеленіс әлемдік энергетикалық нарыққа әсер етуі мүмкін.
Осы уақытта әлемдегі ең ірі бес мұнай компаниясы — ExxonMobil, Chevron, Shell, TotalEnergies және BP — 2026 жылдың екінші тоқсанында рекордтық $70 млрд бос ақша ағынын қалыптастырған. Bloomberg мәліметінше, бұл көрсеткіш алдыңғы тоқсанмен салыстырғанда 600 пайызға көп.
Компаниялардың бұрынғы рекорды $60 млрд болған. Ол 2022 жылдың екінші тоқсанында, Украинадағы соғыс басталғаннан кейін тіркелген.
