Польша премьер-министрі Дональд Туск Варшава мен Киев арасындағы тарихи мәселелерге байланысты туындаған шиеленісті «стратегиялық қателік» деп атап, оның екі елге де зиян келтіретінін мәлімдеді, деп хабарлайды DW.com сайты.
Тусктің айтуынша, қазіргі текетірес Ресей президенті Владимир Путиннің мүддесіне қызмет етеді.
Польша мен Украина арасындағы дипломатиялық дау Украинаның көтерілісшілер армиясына (УПА) қатысты көзқарас айырмашылығынан туындады. Мамыр айында Украина президенті Владимир Зеленский арнайы операциялар күштерінің бір бөлімшесіне УПА қаһармандарының есімін беру туралы жарлыққа қол қойған. Бұл шешім Польшада наразылық тудырды, өйткені Варшава УПА-ны Екінші дүниежүзілік соғыс кезінде поляк халқына қарсы жасалған қылмыстарға жауапты ұйым деп санайды.
Шиеленіс Польша президенті Кароль Навроцкийдің 19 маусымда Зеленскийді Польшадағы ең жоғары мемлекеттік марапат – Ақ қыран орденінен айыру туралы шешімінен кейін күшейді. Бұған жауап ретінде Зеленский орденді Польшаға қайтарғанын хабарлады.
Украина сыртқы істер министрі Андрей Сибига Киев Украинаға қарсы достыққа жат қадамдардың бәріне жауап беретінін мәлімдеді. Сонымен қатар ол тарихи мәселелерді саясаткерлер емес, тарихшылар талқылауы керек екенін атап өтті.
Соған қарамастан, екі ел өкілдері ынтымақтастықты сақтаудың маңызын айтып отыр. Польша мен Украина қауіпсіздік пен еуропалық болашақ тұрғысынан ортақ мүдделерге ие екенін мәлімдеді.
