«Бірлік керуені» көшпенділер ойынына Алтайдағы ең үлкен сарқыраманың суын апара жатыр

Шығыс Қазақстаннан V-ші Дүниежүзілік көшпенділер ойындарына «Бірлік керуені» жолға шықты.

30 тамызда керуенді Елордада болатын байрақты бәсекеге шығарып салу рәсімі өткен болатын. Бұл рәсім Катонқарағай ауданында Белуха тауының етегінде орналасқан Көккөл сарқырамасынан торсыққа су алудан басталды.

Су – Дүниежүзілік көшпендер ойындарының басты нышаны және негізгі элементі. Тіршілік нәрін өңірлердегі киелі бұлақтардан жинайды. Ашылу салтанатында әр өңірдің батырлары өздері алып келген қасиетті суды бір қазанға құйып, елдің бірлігін, тұтастығын және өзара ынтымақтастығын көрсетеді.

Ал Көккөл сарқырамасы - Алтайдағы ең үлкен сарқырама. Ұлы даланың кіндігі болып отырған осы Алтай жері түркілер үшін ежелден киелі мекен саналады. Сондықтан, халықаралық деңгейде өтетін додаға дәл осы жердің суын таңдап алудың үлкен мәні бар.

- Шығыс Қазақстаннан көшпенділер ойынына он елші және бір батыр бара жатырмыз. Біз үшін бұл – үлкен міндет, абырой. Өткенде Көккөл сарқырамасынан торсыққа су алдық, енді соны ойындардың ашылу салтанатына жеткіземіз. Осыйлайша, елдің аманатын арқалап бара жатырмыз десек болады. Қатысушыларға сәттілік тілейміз. Көшпенділер ойынынында еліміздің көк байрағы желбіреп, жеңіс тұғырынан көрінеді деп сенеміз, - деді «Бірлік керуенінің» елшісі Қуаныш Рахметоллаұлы.

Айта кетелік, көшпенділер ойындарына Шығыс Қазақстан облысынан 20 спортшы қатысады. Олар спорттың үш түрінен арқан тарту, садақ ату және таяқ тарту бойынша бақтарын сынайды.

Фото: Altainews.kz