«Ұлы дала жорығы» халықаралық марафонына 10-нан астам елдің шабандоздары қатысады
Халықаралық марафон-бәйгесі 3-7 қыркүйек аралығында өтеді.
«Ұлы дала жорығы» халықаралық марафон-бәйгесінде 10-нан астам елдің шабандоздары 500 шақырымға жарысады, деп хабарлайды Malim.kz.
2024 жылғы 3-7 қыркүйек аралығында алғаш рет «Ұлы дала жорығы» халықаралық марафон-бәйгесі өтеді. Жарыс 5-ші Дүниежүзілік көшпенділер ойындары қарсаңында өтеді.
Ұлттық спорт қауымдастығының мәліметінше, ауқымды спорттық шараға 10-нан астам елден командалар қатысады деп күтіліп отыр. Иран, Түркия, Венгрия, Қырғызстан, Оңтүстік Африка Республикасы Ресей Федерациясының және т.б. елдердің шабандоздары бақ сынайды деп жоспарланған.
Бүгінде Қырғызстан құрамасы «Ұлы дала жорығына» қатысатын ең үздік аттарды іріктеу мақсатында көпкүндік ат спорты марафонын өткізді.
Қырғызстан Ат спорты федерациясының вице-президенті Манас Сұлтанов «Ұлы дала жорығы» марафон-бәйгесіне шақыруды қабылдау үлкен мәртебе екенін айтты.
Қазақстанда өтетін көпкүндік ат жарысына дайындық аясында 300 шақырымдық қашықтыққа «Кочмондор журушу» іріктеу марафоны өтті. Барлық командаларға сәттілік тілеймін және жеңімпаздардың көп болуын қалаймын. Ең төзімді және жылдам сәйгүліктер жеңіске жетіп, тұғырдан көрінетініне сенімдімін, - деді Сұлтанов.
Марафон-бәйге 3 қыркүйекте Солтүстік Қазақстан облысындағы Ботай елді мекенінен бастау алады. Дәл сол жерде 5 мың жылдан астам бұрын адам баласы жылқы малын алғаш рет қолға үйреткен.
Аталған жорыққа Кабардин-Балқар Республикасының құрамасы да қатысуға дайындалып жатыр. «АМД Кавказ» ат спорты клубының негізін қалаушы Ахъед Махов қазақстандық ат жарысына қатысуға шақырту алғанын айтты.
Марафон-бәйгенің бүкіл адамзат үшін киелі мекен саналатын Ботай қонысынан басталуы ерекше маңызды. Біздің команда аңыздар мен тарихи жәдігерлерге толы Ботай жеріне баруға ерекше ынталы. Олай болса, күт бізді, Қазақстан! - деді ол.
Ат жарысы Астанада 7 қыркүйекте аяқталады. Оның жеңімпаздары 8 қыркүйекте өтетін 5-ші Дүниежүзілік көшпенділер ойындарының ашылу салтанатына қатысады.
Естеріңізге сала кетейік, «JORYQ» республикалық федерациясы Қазақстан Республикасы Ұлттық спорт қауымдастығының құрамына кіреді. Сонымен қатар Қауымдастық құрамына бәйге, көкпар, аударыспақ, асық ату, садақ ату, жамбы ату, теңге ілу, құсбегілік және т.б. федерациялар кіреді. Қазақстан Республикасының Ұлттық спорт қауымдастығына белгілі кәсіпкер, меценат, «Алтын Қыран» қоры қамқоршылық кеңесінің төрағасы» Исламбек Салжанов басшылық етеді.
Фото: Ұлттық спорт түрлері қауымдастығы
Байланысты жаналықтар
MalimBlocks
