Қазақстанда зейнет жасына жақындаған қызметкерлерді штат қысқаруына байланысты жұмыстан шығару мәселесі жиі кездеседі. Алайда адамның зейнетке жақындауы оны жұмыстан шығаруға автоматты түрде негіз бола алмайды, деп Malim.kz тілшісі, Tengrinews.kz-ке сілтеме жасап хабарлайды.
Еңбек министрлігінің өкілі Ерлан Исмағұловтың айтуынша, зейнеталды жаста болудың өзі штат қысқартудан толық қорғамайды. Дегенмен жұмыс беруші Еңбек кодексінде белгіленген талаптарды қатаң сақтауға міндетті.
Зейнет жасына толуына екі жылдан аз уақыт қалған қызметкерлерге арнайы кепілдік қарастырылған. Мұндай азаматпен еңбек шартын штат немесе қызметкерлер саны қысқарған жағдайда, сондай-ақ біліктілігінің жеткіліксіздігіне байланысты атқаратын қызметіне сәйкес келмесе, арнайы комиссияның оң шешімінсіз бұзуға болмайды.
Аталған комиссия жұмыс беруші мен қызметкерлер өкілдерінің тең санынан құрылады.
Сонымен қатар Еңбек кодексінің 6-бабы еңбек саласында жасына қарай кемсітуге тыйым салады. Исмағұлов зейнеталды жас пен зейнет жасын тең ұғым ретінде қарастыруға болмайтынын атап өтті. Қызметкердің зейнет жасына жақындауы жұмыс берушіге онымен еңбек шартын тоқтатуға өздігінен құқық бермейді.
Егер қызметкер жұмыстан шығаруды заңсыз деп санаса немесе еңбек құқықтары бұзылды деп есептесе, мемлекеттік еңбек инспекциясына жазбаша өтінішпен жүгіне алады.
Сарапшылардың түсіндіруінше, Еңбек кодексінің 53-бабында зейнет жасына екі жылдан аз қалған қызметкерлерге арнайы қорғаныс қарастырылған. Ал зейнет жасына жетудің өзі адамның жұмысын міндетті түрде тоқтатуы керек дегенді білдірмейді.
