Алакөл жағалауындағы Көктұма ауылында паромның астында қалған 70 жастағы әйел ауыр жарақат алып, екі аяғынан айырылды. Оқиғаға байланысты қылмыстық іс қозғалды, деп хабарлайды Malim.kz.
Алдын ала мәлімет бойынша, паром қозғалыс кезінде артқа жүріп, жағалауда тұрған әйелді қағып кеткен. Зардап шегуші аса ауыр жағдайда ауруханаға жеткізілді.
Жетісу облыстық денсаулық сақтау басқармасының хабарлауынша, әйел көп мөлшерде қан жоғалтып, травмалық шок алған.
Дәрігерлер шұғыл консилиум өткізіп, науқастың өмірін сақтап қалу үшін жедел ота жасау туралы шешім қабылдаған. Операция кезінде оның екі аяғы да жамбас тұсынан кесілді.
Оқиға бойынша Жетісу облысының полиция департаменті қылмыстық іс қозғады. Қазір қайғылы жағдайдың барлық мән-жайы анықталып жатыр.
