Грузия Орталық сайлау комиссиясы президент сайлауын өтті деп таныды
Сайлаушылар алқасының жартысынан астамы дауыс беруге қатысқан
Грузиядағы президент сайлауы өтті деп танылды, өйткені 300 адамнан тұратын сайлаушылар алқасының жалпы санының жартысынан астамы дауыс беруге қатысты. ТАСС агенттігінің жазуынша, бұл ақпаратты Грузияның Орталық сайлау комиссиясының баспасөз хатшысы Натия Иоселиани брифингте мәлімдеген, деп хабарлайды Malim.kz.
Сағат он бір жарымға дейін сайлаушылар алқасының 170 мүшесі дауыс беруге қатысты. Сәйкесінше, жалпы құрамның жартысынан астамы қатысқандықтан, сайлау өтті деп саналады, деді ол.
Иоселианидің айтуынша, дауыс беру жергілікті уақыт бойынша сағат 14:00-ге дейін жалғасады, содан кейін ОСК дауыстарды санауға кіріседі.
Айта кетейік, Грузияда сенбі күні алтыншы президент сайланып жатыр. Мемлекет басшысы алғаш рет тікелей дауыс беру арқылы емес, 300 сайлаушыдан тұратын алқа отырысында сайланып жатыр. Оған 150 грузиялық парламент депутаты кіреді. Президенттікке жалғыз кандидат – билеуші «Грузияның арманы – Демократиялық Грузия» партиясы ұсынған, бұрын футболшы, кейін парламент депутаты болған Михаил Кавелашвили.
Айта кетейік, бұған дейін Грузия президенті Саломе Зурабишвили бүгін өтетін президент сайлауын заңсыз деп санайтынын және бұл сайлау нәтижелерін мойындамайтынын мәлімдеген еді.
Фото: Инна Кукуджанова/ТАСС
Байланысты жаналықтар
MalimBlocks
