Қырғызстанда болған сел тасқынынан қаза тапқан туристер арасында қазақстандықтар бар. Қазірдің өзінде кәмелетке толмаған екі баланың денесі табылған, деп хабарлайды Malim.kz.
Қырғызстанда 28 маусымда болған нөсер жауын-шашыннан Ош облысының Ноокат ауданында жойқын сел тасқыны өткен. Соның салдарынан тұрғындар мен туристер зардап шеккен.
Қырғызстанның Төтенше жағдай министрлігінің алдын ала берген ақпараты бойынша, қаза тапқандар арасында Қазақстанның кәмелетке толмаған азаматтары бар. Қазірдің өзінде екі баланың денесі табылып, тағы екеуін іздеу жұмыстары жалғасып жатыр.
Табиғи апат орнында қырғыз тарапының құтқару қызметтері жұмыс істеп жатыр. СІМ мәлімдеуінше, қазақстандық дипломаттар жергілікті билікпен тұрақты байланыста. Қырғызстандағы Елшілігіміз қайтыс болған балалардың туыстарына барлық қажетті көмек көрсетіп жатыр. Бұл қайғылы оқиғаны Сыртқы істер министрлігі ерекше бақылауға алған.
Осыған байланысты Қазақстан Сыртқы істер министрі Мұрат Нұртілеу Қырғызстан СІМ басшысы Жээнбек Кулубаевпен телефон арқылы сөйлесіп, төтенше жағдайдың мән-жайын және екі елдің тиісті мемлекеттік органдарының өзара іс-қимылын талқылаған.
Қазіргі сәтте Қырғызстан Төтенше жағдайлар министрлігінің мәліметінше, тасқыннан қаза тапқандар саны 8 адамға жеткен.
Фото: turmush.kg
MalimBlocks
