Google компаниясының қожайыны Alphabet пен Apple компаниялары АҚШ-та TikTok қосымшасын өздерінің дүкендерінен 19 қаңтарға дейін алып тастауға дайын болуы керек. CNN жазуынша, оны жұма күні АҚШ-тың екі конгрессмені аталған компаниялардың бас директорларына жолдаған хатында мәлімдеген, деп хабарлайды Malim.kz.
Өткен аптада АҚШ-тың федералдық апелляциялық соты Қытайдың ByteDance компаниясына TikTok-ты АҚШ-та сатуға міндеттейтін немесе қосымшаға тыйым салатын заңды қолдады. Бүгінде бұл қосымшаны 170 миллион америкалық қолданады.
АҚШ Әділет министрлігі сәрсенбі күні тыйым 19 қаңтарда күшіне енсе, бұл Apple немесе Google пайдаланушылары TikTok-ты бұрын жүктеп алған жағдайда оны пайдалануды тікелей шектемейтінін мәлімдеді. Алайда, қолдау көрсетуді тоқтату ақырында қосымшаны жарамсыз ететінін мойындаған.
MalimBlocks
