Президент Қасым-Жомарт Тоқаев Тәуелсіздік күні қарсаңында өткен Мемлекеттік наградалар тапсыру рәсімінде сөйлеген сөзінде келесі жылды «Тәуелсіздіктің 30 жылдығы» деп жариялағанын айта келіп, төртінші онжылдықта не күтіп тұрғанын айтып өтті.
Сонымен төртінші онжылдыққа қатысты президент не айтты?
–Алдағы төртінші он жылдықта бізді жаңа міндеттер күтіп тұр. Елімізді ілгері дамытып, әрбір азаматтың лайықты тұрмысын қамтамасыз етуіміз керек. Оны жүзеге асырудың басты жолы – тиімді басқару жүйесі. Жолдауымда мемлекеттік басқарудың жаңа үлгісіне баса мән бергенімді білесіздер. Осыған орай, көптеген нақты шаралар атқарылуда. Жалпы, жаңғырудың жан-жақты болғаны жөн. Бүкіл халқымыз заман ағымына ілесе білуге тиіс. Өзгерістерге бейімделе алатын жұрт қана уақыт тынысын дөп басады. Біз білімді әрі білікті, ұқыпты және жауапты, іскер де еңбекқор жұрт болуымыз қажет. Бұл – Ұлы Абай айтқандай, «толық адамның» айқын көрінісі. Оған қоса, әркімнің жеке қасиеті мен мақсаты елдік мүддемен тығыз астасып, патриотизмге ұласуы керек. Сонда ғана мемлекетшілдік идеясы басты құндылыққа айналады.
–Біз экономикасы мықты, әлеуметтік теңдігі бар, даму құндылықтарын жоғары қоятын ашық қоғам орнатамыз. Бұл межеге бірізділік реформа мен сапалы өзгеру арқылы жетеміз. Осы саясат жалғаса береді. Және бұл саясатқа кері жол да, өзге жол да жоқ.
Президент сөзінің толық мәтіні мына сілтемеде.
