Атырауда армян, грузин және ресейлік нөмірі бар көлік иелері қала көшелерінде стихиялық түрде жиналды. Бұған қалаға Қазақстанның басқа өңірлерінен күшейтілген полиция патрульдерінің келуі себеп болған, деп хабарлайды Malim.kz «Ак Жайык» басылымына сілтеме жасап.
Полиция қызметкерлері жүргізушілердің құжаттарын, сақтандыру полистерін, дәрі қобдишасын, өрт сөндіргішін және шетелдік тіркеудегі көліктердің заңдылығын тексерген.
Жиналған жүргізушілер ықтимал айыппұлдар, сақтандыру мәселесі және көліктердің алдағы тағдыры туралы нақты түсініктеме ала алмағандарын айтты.
Бейресми деректерге сүйенсек, Атырауда шетелдік нөмірмен жүрген 5 мыңнан астам көлік бар. Олардың басым бөлігі Грузия мен Армениядан әкелінген.
Атырау облыстық полиция департаменті күшейтілген рейдтердің «Тоқта-бұзушылық» жедел-профилактикалық іс-шарасы аясында өтіп жатқанын мәлімдеді. Іс-шара жол қауіпсіздігін бақылау және құқықбұзушылықтардың алдын алу мақсатында жүргізіліп жатыр. Рейдтер 23 мамырға дейін жалғасады.
