Ауғанстанда әйелге күш көрсеткені үшін сот 15 тәулікке қамау жазасын тағайындайды, ал итке немесе қойға қатыгездік жасағаны үшін 5 айға дейін бас бостандығынан айыру жазасы қарастырылған. Ауғанстанның жаңа заңының 119 бабында әйелдерге қатысты зорлық-зомбылық заңдастырылып, болжамды құқық бұзушылықтар үшін жазаны кім тағайындай алатыны айқындалады. Олардың қатарында имамдар мен күйеулер бар.
32-бапқа сәйкес, егер күйеуі әйелін сүйек сынуына, ашық жарақаттарға немесе денесіндегі көгерулерге әкелетіндей қатты ұрса және әйел судьяға жүгінсе, онда күйеуі қылмыскер деп танылады. «Судья оны 15 тәулікке бас бостандығынан айыру жазасына кесуі тиіс», — деп көрсетілген бапта. Ал егер ер адам итке немесе қойға қатыгездік танытса, оған 5 айға дейін бас бостандығынан айыру қаупі төнеді.
Заң Ауғанстанда 2026 жылдың басында қабылданған, алайда халықаралық реакцияны жақында ғана тудырды. Алдымен ауған құқық қорғау ұйымы Rawadari оны пушту тілінде түпнұсқа нұсқасында жариялады, кейін Afghan Analysts Network құжатты ағылшын тіліне аударды.
«Women for Afghanistan» ұйымының жетекшісі Фавзия Куфи испаниялық El País газетіне берген сұхбатында, егер әйел 15 күннен кейін күйеуі бостандыққа шығып, өзін өлтіруі мүмкін екенін білсе, оның сотқа жүгінуі екіталай екенін айтты. Оның бағалауынша, жаңа заң ер адамдарға әйелдерге күш қолдануға және оларды азаптауға құқық береді.
Бес жыл бұрын талибандар билікке қайта оралғалы бері Ауғанстандағы әйелдердің құқықтары айтарлықтай шектелді. UN Women деректеріне сәйкес, әйелдердің 80%-ы еңбек нарығы мен білім беру жүйесінен шеттетілген. БҰҰ-ның Адам құқықтары жөніндегі жоғарғы комиссары Фолькер Тюрк жаңа жарлық «әйелдер мен балаларға қатысты зорлық-зомбылықты заңдастырады» деп мәлімдеп, Ауғанстан «адам құқықтарының зиратына» айналғанын ескертті.
