Біріккен Араб Әмірліктері 2026 жылғы 1 мамырдан бастап Мұнай экспорттаушы елдер ұйымынан (ОПЕК) және ОПЕК+ альянсынан шығатынын жариялады, деп хабарлайды Malim.kz.
Ресми мәлімдемеде бұл шешім елдің ұзақмерзімді стратегиясына сәйкес қабылданғаны айтылған. Ол энергетика секторын дамыту және ішкі өндірістік қуатты арттыруға инвестицияларды жеделдету жоспарларымен байланысты.
Абу-Дабиде ОПЕК-тен шыққаннан кейін ел мұнай өндіру көлемін сұраныс пен нарық жағдайына қарай біртіндеп арттыра беретінін мәлімдеді.
«Бұл шешім БАӘ-нің өндірістік саясатын, қазіргі және болашақтағы қуаттарын, сондай-ақ ұлттық мүдделерді жан-жақты қайта қарау нәтижесінде қабылданды», — делінген ресми хабарламада.
Мәлімдемеде бұл қадамға геосаяси тұрақсыздық, соның ішінде Парсы шығанағы мен Ормуз бұғазындағы жағдай, сондай-ақ орта және ұзақ мерзімді перспективада энергия ресурстарына жаһандық сұраныстың артуы әсер еткені атап өтілген.
БАӘ билігі әлемдік энергия нарығының тұрақтылығы сенімді әрі қолжетімді жеткізілімдерге байланысты екенін атап өтті. Ел бұдан әрі де жауапты әрі сенімді жеткізуші болып қала бермек.
Сондай-ақ мәлімдемеде БАӘ-нің ОПЕК-ке 1967 жылы Абу-Даби әмірлігі арқылы қосылғаны, ал 1971 жылы мемлекет құрылғаннан кейін ұйымдағы мүшелігін сақтағаны еске салынды. Осы уақыт ішінде ел әлемдік мұнай нарығының тұрақтылығын сақтауда белсенді рөл атқарғаны айтылған.
Абу-Дабиде ОПЕК пен ОПЕК+-тан шығу мұнай өндірушілер мен тұтынушылармен ынтымақтастықтан бас тарту емес екені және әлемдік нарық тұрақтылығына деген ұстанымды өзгертпейтіні атап өтілді.
Сонымен қатар БАӘ энергетика саласының барлық бағыттарына, соның ішінде мұнай мен газға, жаңартылатын энергия көздеріне және төмен көміртекті шешімдерге инвестиция салуды жалғастыру ниетін білдірді.
