Мемлекеттік білім гранты иелерінің тізімі жарияланды

Ғылым және жоғары білім министрлігі мен Ұлттық тестілеу орталығы 2024-2025 оқу жылына арналған білім гранты иегерлерінің тізімі жариялады, деп хабарлайды Malim.kz.

Грантқа 104 мыңнан астам талапкер құжат тапсырған. Бұл өткен жылғы көрсеткіштен 10 мыңға артық.

Грантқа ең үлкен талас «Стоматология» мамандығында тіркелген. Бір орынға 35 талапкер таласқан. Соған ұқсас жаңдай «Халықаралық қатынастар және дипломатия» (11 адам), «Дене шынықтыру мұғалімдерін даярлау» (10 адам), «Аударма ісі» және «Психология» (9 адам) мамандықтарында болған.  

Грантқа үміткерлер арасында балы тең түскен жағдайда басым құқыққа ие болатын 22 мыңнан астам талапкер, олардың ішінде  «Алтын белгі» иегерлері, халықаралық және республикалық олимпиадалардың жеңімпаздары, оқу үздіктері бар. Сондай-ақ, гранттарды үйлестіру барысында әлеуметтік осал санаттағы балалардың квоталары ескерілді, деп жазылған ресми мәлімдемеде.

Жоғары оқу орындарына құжат тапсыру 25 тамызға дейін жалғасады.

Естеріңізге сала кетсек, гранттардың басым бөлігі инженерлік және техникалық бағыттарға бөлінген. Алғаш рет ішінара оқу ақысы бар сараланған гранттар енгізілді. «Педагогикалық ғылымдар» және «Әлеуметтік ғылымдар, журналистика және ақпарат» бағыттары бойынша 150 сараланған гранттан бөлінген. Сондай-ақ, «Серпін» бағдарламасы арқылы түсушілерге 3 903 грант қарастырылған. Гранттар тізімінде халық тығыз қоныстанған және батыс өңірлері жастарын жетекші жоғары оқу орындарында оқыту үшін 5 мың мақсатты білім беру гранты бар.

Толық тізіммен мына сілтемеде танысуға болады.

Фото: timeskz.kz