Сыбайлас жемқорлыққа қарсы қызметке кәсіпкерлер Теректі ауданы жұмыспен қамту және әлеуметтік бағдарламалар бөлімі шенеунігінің заңсыз әрекеттеріне қатысты жүгінген.
-Теректі ауданының жұмыспен қамту және әлеуметтік бағдарламалар бөлімі тарапынан кәсіпкерлерге ақпараттық таблоны сауда үй-жайының сыртына орналастыру жөнінде негізсіз талаптар қойылғаны анықталды. Аталған таблоны кәсіпкерлер сауда үй-жайының сыртына орнатқан. Оны орнату сыртқы (көрнекі) жарнама үшін салық төлемдерін кейін төлеуді көздейді. Бұл ретте сәулет, қала құрылысы және құрылыс саласындағы мемлекеттік нормативтер жөніндегі қағидаларға сәйкес, талаптар сауда үй-жайының ішкі рәсімделуіне ғана қолданылады,- делінген облыстық Антикор таратқан ақпаратта.
Malim.kz тілшісі Батыс Қазақстан облысы Сыбайлас жемқорлыққа қарсы іс-қимыл агенттігінің баспасөз қызметіне хабарласып, кәсіпкерлерге кедергі келтірген шенеуніктің аты-жөнін сұрамақ болған, алайда қоңырауға жауап бермеді.
Теректі ауданы жұмыспен қамту және әлеуметтік бағдарламалар бөлімінің басшысы Арайлым Махметқызына да хабарласқанбыз, алайда ол жиналыстамын деп, тұтқаны қоя салды.
