Конго Демократиялық Республикасында Эбола безгегінің өршуінен 80 адам қайтыс болды, деп хабарлайды Malim.kz ДДСҰ-ға сілтеме жасап.
Осыған байланысты World Health Organization халықаралық деңгейдегі төтенше жағдай режимін жариялады.
Ұйым мәліметінше, қазіргі жағдай жаһандық денсаулық сақтау саласына қауіп төндіреді және мемлекеттер арасындағы үйлесімді әрекетті талап етеді. Алайда әзірге пандемия жариялауға негіз жоқ екені атап өтілді.
Эбола жұқтыру жағдайларының басым бөлігі Конгоның шығыс аймағында тіркелген. 16 мамырдағы дерек бойынша Итури провинциясында сегіз адамнан вирус расталған, тағы 246 жағдай күдікті ретінде қарастырылып отыр. Сонымен қатар 80 адамның көз жұмғаны хабарланды.
Ауру ошақтары Буниа, Рвампара және Монгбвалу медициналық аймақтарында анықталған.
Инфекция өңірден тыс жерлерге де тарала бастаған. 15-16 мамыр күндері Кампалада Конгодан келген адамдардан Эбола вирусының екі жағдайы расталды. Науқастардың бірі қайтыс болды. Сондай-ақ Итуриден оралған тағы бір адамнан Киншасада вирус анықталған.
ДДСҰ сарапшылары вирустың нақты таралу ауқымы ресми статистикадан әлдеқайда кең болуы мүмкін деп есептейді. Бұған оң нәтиже көрсеткен тесттердің көп болуы, күдікті жұқтыру мен өлім жағдайлары туралы хабарламалардың көбеюі, сондай-ақ инфекцияның таралу тізбегінің толық анықталмауы себеп болып отыр.
Ұйым қосымша қауіп факторлары ретінде гуманитарлық дағдарысты, халықтың белсенді көші-қонын, қауіпсіздік саласындағы тұрақсыз жағдайды және бейресми медициналық мекемелер санының көптігін атады.
Сонымен қатар вирус белгілері байқалған кемінде төрт медицина қызметкерінің қайтыс болғаны хабарланды.
