Маңғыстауда астан уланған оқушылардың екеуі жансақтау бөлімінде
Облыс әкімі оқушылардың жағдайымен танысты
Маңғыстау облысының әкімі Нұрдәулет Қилыбай облыстық ауруханада жатқан оқушылардың жағдайымен танысты, деп хабарлайды Malim.kz.
Облыс әкімдігінің мәліметінше, ауруханада қазір 67 бала ем қабылдап жатыр. Олар күні кеше Мұнайлы ауданындағы 8-мектепте жаппай астан уланып, ауруханаға түскен. Екі бала жансақтау бөлімінде дәрігерлердің жіті бақылауында.
Облыстық әкімдік жанындағы жедел штаб қарқынды жұмысқа кіріскен. Шақыртуларға дереу қызмет көрсету үшін облыстық жедел және шұғыл медициналық көмек станциясының 12 негізгі және 4 қосымша бригадасы жұмыс істеп жатыр. Сондай-ақ, Мұнайлы орталық аудандық ауруханасының шақыруларға қызмет көрсетудің 4 санатты 4 бригадасы және Ақтау қаласының 4 санатты 7 бригадасы жұмылдырылған.
Облыстағы емханалардың психологтар тобы ата-аналар мен балаларға қажетті көмек көрсетіп отыр.
Айта кетейік, 6 қыркүйекте Бесшоқы ауылында оқушылар жаппай уланып, 141 балаға медициналық көмек қажет болған. Балалар білім беру мекемесінің асханасында уланған. Бұл дерекке қатысты қылмыстық іс қозғалған.
Фото: Instagram/mangystau_oblysynyn_akimdigi
