Жаңа немесе салқындатылған картопты ел аумағынан үшінші елдерге көліктің барлық түрімен шығаруға 6 ай мерзімге тыйым салынбақ. Осындай шектеу енгізетін Ауыл шаруашылығы министрлігі бұйрығының жобасы «Ашық НҚА» порталында жарияланды, деп хабарлайды Malim.kz.
2024 жылдың 11 айындағы статистика мәліметтері бойынша, картоп экспорты 518,4 мың тоннаны (47,1 млн доллар) құраған. Бұл 2023 жылдың сәйкес кезеңімен салыстырғанда (332,3 мың тонна, 25,2 млн доллар) 1,5 есе көп.
2023 жылы картоп экспорты 412 мың тонна (31,3 млн доллар) болған.
Халықтың жылдық картопқа қажеттілігі 2 026,5 мың тоннаны (айына 168,8 мың тонна) құрайды, 2025 жылдың қаңтар-сәуір айларында нарықтың қажеттілігі шамамен 675 мың тонна болады деп күтіледі, деп жазылған бұйрық жобасында.
Сонымен бірге, облыстар мен қалалардың әкімдіктерінің деректері бойынша, биылғы 15 қаңтардағы жағдай бойынша картоп қорының көлемі 301 мың тоннаны құрайды.
Биылғы маусымаралық кезеңде (қаңтар-сәуір) жалпы халықтың қажеттілігі 675 мың тонна болғандықтан, картоп тапшылығы 374 мың тонна болуы мүмкін.
Сөйтіп, картоп экспорты көлемінің ұлғаюын және ішкі нарықта картоп тапшылығының алдын алу немесе азайту қажеттілігін ескере отырып, ел аумағынан үшінші елдерге картопты шығаруға тыйым салу туралы шешім мекемеаралық комиссия отырысында қабылданған.
Фото: freepik.com
