Алматыда автобуста оқушыны ұрған тұрғын ұсталды

Алматы Полиция департаменті автобуста мектеп оқушысына шабуыл жасаған егде жастағы ер адамның ұсталғанын хабарлады. 

Ведомство бұл іс бойынша тергеу басталғанын мәлімдеді.  

"Аталған факт бойынша Әуезов ауданының полиция басқармасы тергеу жүргізіп жатыр. Құқықбұзушының жеке басы анықталып, ол ұсталды. Фигуранттың әрекеттеріне құқықтық баға беріледі", – деп хабарлады Полиция департаментінің баспасөз қызметі.  

Еске салсақ, бұған дейін желіде автобустағы егде жастағы жолаушының мектеп оқушысына шабуыл жасағаны түсірілген видео жарияланған еді. Қыздың айтуынша, оқиға ер адамның оқушының аяғынан теуіп оятудан басталған. Кейін ер адам сөзбен тиісіп, соңында оның бетіне соққы жасап, көзілдірігін жұлып алып, сындырып тастаған.  

Фото: m.kolesa.kz